ད་ནི་གཉིས་པ་རྒྱ་གར་འཕགས་པའི་ཡུལ་དུ་དཔལ་ལྡན་ལྷོ་པ་ཁང་ཚན་གྱི་ལོ་རྒྱུས་སམ་བྱུང་རབས་དེ་གླེང་ན། ཐོག་མར་གྲྭ་མང་སྤྱི་མཚུངས་ལྟར་ལྷོ་པ་ཁང་ཚན་གྱི་དགེ་འདུན་བརྒྱད་བཅུ་གྱ་བདུན་ཙམ་བོད་ས་སྨྲ་སྒོ་ལ་བརྒྱུད་ནས་མི་སུ་མ་རི་ལ་ཕེབས། དེ་ནས་ཌ་ལ་ཝ་སི་དང་། ལམ་བཟོ་ལ་ཕེབས་མཁན་མང་དག་ཅིག་བྱུང་བ་ཕུད་སྦག་ས་ལ་བཞུགས་མཁན་དགེ་འདུན་ཞལ་གྲངས་སུམ་ཅུ་ཙམ་ཡོད། དེ་ནས་འགའ་ཞིག་ཝཱ་ར་ཎ་སིའི་སློབ་དགེ་དང་། འགའ་ཞིག་སློབ་ཕྲུག འགའ་ཞིག་བོད་གཞུང་གི་དགེ་རྒན་འོས་སྦྱོང་། གཞན་ཡང་དང་བླང་དམག་སྦྱོང་བཅས་ལ་ཕེབས་མཁན་མི་ཉུང་བ་ཞིག་ཡོད་པ་ཕུད་དེ་བྱིངས་དགེ་འདུན་ཞལ་གྲངས་བཅུ་གསུམ་ཙམ་ཕྱི་ལོ་ ༡༩༦༩ ལོར་རྒྱ་གར་ལྷོ་ཕྱོགས་མོན་གྷོ་ལ་ཕེབས་ཐུབ་ཡོད།
སྐབས་དེར་རྒྱ་གར་གཞུང་གིས་དགེ་འདུན་པ་ལྔ་རེ་ལ་རས་གུར་རེ་གནང་བ་དེའི་ནང་དུ་བཞུགས། དེ་ནས་གྲྭ་པ་སོ་སོས་དཀའ་ལས་རྒྱབ་སྟེ་རྩྭ་དང་སྨྱུག་མ་སོགས་བཅད་ནས་རྩྭ་ཁང་བཟོས་པ་དེའི་ནང་གནས་གཞི་བཅས། དེ་ནས་དུས་ཡུན་གང་འཚམས་ཀྱི་རྗེས་རྒྱ་གར་གཞུང་གིས་གྲྭ་པ་གཉིས་རེ་ལ་རྫ་ཐོག་ཅན་གྱི་ཁང་པ་རེ་གསོལ་རེས་གནང་བ་དེའི་ནང་བཞུགས། སྐབས་དེར་འཚོ་བ་དང་སྡོད་གནས་སོགས་གང་ཅི་ཐད་ནས་སྐུ་ངལ་ཆེ་ན་ཡང་གཞུང་ལུགས་རྒྱ་མཚོ་ལྟ་བུ་ལ་ཐོས་བསམ་སློབ་གཉེར་ཚུལ་བཞིན་གནང་བ་སོགས་དཀའ་བ་བརྒྱ་ཕྲག་དུ་མའི་སྒོ་ནས་རྒྱལ་བའི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་བགྱིས་པ་དང་། སྔོན་གྱི་ཕྱག་བཞེས་བཟང་པོ་མི་ཉམས་རྒྱུན་འཛིན་ཐུབ་པ་སོགས་ནི་བཤད་པར་དཀའ་བའི་བླ་ན་མེད་པའི་མཛད་རྗེས་ཤིག་ཡིན། དགེ་འདུན་གྱི་སྡེ་ཞིག་ཡོད་ན་ཆོས་ཕྱོགས་ཀྱི་མཛད་རིམ་ཞིག་ཡོད་པ་བཤད་ཅི་དགོས། དཔལ་ལྡན་ལྷོ་པ་ཁང་ཚན་གྱི་དགེ་འདུན་རྣམས་ཀྱང་ཚོགས་འཚོགས་པའི་གནས་གཞི་ཞིག་ཟུར་དུ་དགོས་ཀྱང་འཁོས་འབྱོར་གྱིས་རྐྱེན་པས་རེ་ཞིག་སྡོད་ཁང་གི་ནང་དུ་ཚོགས་འཚོགས་པ་སོགས་ཆོས་ཕྱོགས་ཀྱི་བྱེད་སྒོ་ཁག་སྒྲུབ་ཀྱི་ཡོད་པས་ཁང་ཚན་གྱི་ཚོམས་དང་པོ་དེ་ཡིན་ཞེས་བཤད་ཀྱང་ཆོག །དེ་ནས་བླ་མ་མཉམ་འབྲེལ་གྱི་ཁང་པའི་ནང་ཚོགས་འཚོགས་པ་སོགས་བྱེད་ཀྱི་ཡོད་པས་ཁང་ཚན་གྱི་ཚོམས་གཉིས་པ་དེ་ཡིན། འདི་ནི་ཐོག་མར་ཁང་བླ་སྤྲད་ནས་གཡར། དེ་ནས་རིན་པ་སྤྲད་ནས་ཉོས་པ་ཡིན། ནང་རྟེན་གྱི་ཐོག་མ་རྗེ་ཡབ་སྲས་གསུམ་གྱི་སྐུ་དེ་དེའི་སྐབས་སུ་ཡོད། དེ་ནས་རིམ་བཞིན་ཝཱ་ར་ཎ་སི་ལ་ཕེབས་པའི་སློབ་དགེ་དང་དེ་བཞིན་དགེ་ཕྲུག །དང་བླང་དམག་ཟུར་བཅས་དགོན་པར་ཞབས་སོར་འཁོད་པ་དང་། གཞིས་བྱེས་འགྲོ་འོང་གི་འབྲེལ་བ་བྱུང་སྟེ་བོད་ནས་གསར་དུ་འབྱོར་བ་མང་བ་བཅས་དགེ་འདུན་ཞལ་གྲངས་བརྒྱ་ཕྲག་གཉིས་ལ་ཉེ་བ་འཕེལ་ནས་སྡོད་ཤག་དང་ཚོམས་སོགས་ཀྱི་དཀའ་ངལ་ཆེ་བར་བརྟེན་རང་ཁུངས་ཀྱི་རྒན་པ་རྣམས་ནས་སྐུ་ངལ་འཛེམ་མེད་ཐོག་ཕྱོགས་མཐར་ཁག་ལ་སློང་དེབ་ཁྱེར་ནས་སློང་མོ་གང་འཚམས་བྱས་ཡོད་གཙོ་བོ་བཀྲིན་གྱི་བདག་ཉིད་དགེ་བའི་བཤེས་གཉེན་ཆེན་པོ་རྒན་ཚུལ་ཁྲིམས་རྒྱལ་མཚན་མཆོག་ནས་ནུབ་ཕྱོགས་ཨ་རི་ས་ཁུལ་དུ་ཐུབ་བསྟན་དར་རྒྱས་གླིང་གི་ཆོས་ཚོགས་གསར་འཛུགས་གནང་བ་དང་། དགེ་བཤེས་མཆོག་ནས་ཁང་ཚན་ལ་འཕྲད་བཞིན་པའི་ཚོམས་དང་གྲྭ་ཤག་སོགས་ཀྱི་དཀའ་ངལ་རྣམས་ལ་གཟིགས་པ་ཆེན་པོས་རོགས་རམ་གྱི་མཐུན་འབྱོར་ཕྱག་དངུལ་ཁྱོན་ཆེན་བཀྲིན་སྩལ་བ་ལ་བརྟེན་ནས། བོད་རྒྱལ་ལོ། ༢༡༡༣ ཕྱི་ལོ་ ༡༩༨༦ ལོར་རྒྱ་གར་ལྷོ་ཕྱོགས་མོན་གྷོ་ས་གནས་དགའ་ལྡན་རྣམ་པར་རྒྱལ་བའི་གླིང་གི་ཤར་ཕྱོགས་སུ་དེ་སྔོན་གྲྭ་ཚང་གིས་གནང་བའི་ས་སྐལ་དང་། བླ་མ་མཉམ་བྲེལ་གྱི་ལག་ནས་ཉོས་པའི་ས་ཆ་བཅས་གྲྭ་ཚང་རིན་པོ་ཆེ་ལ་ཕུལ་ནས་གྲྭ་ཚང་གིས་དེའི་ཚབ་ཏུ་གནང་བའི་ས་ཆ་ཁང་ཚན་ལ་རང་བདག་ཡོད་པ་དེའི་སྟེང་དུ་ལྷོ་པ་ཁང་ཚན་ཀྱི་ཚོམས་ཀ་བ་དྲུག་ཡོད་པ། སྟེང་ཐོག་ཏུ་གཟིམ་ཆུང་སོགས་མདོ་སྦུག་གཉིས་ལྡན་གྱི་ཤག་གསུམ་དང་ཤག་དཀྱུས་མ་གསུམ་བཅས་ཡོད། གཞན་ཡང་གྲྭ་ཤག་ཐོག་བརྩེགས་གཉིས་ཅན་མདོ་སྦུག་གཉིས་ལྡན་གྱི་ཤག་ལྔ་དང་དཀྱུས་མ་ཉི་ཤུ་རྩ་གསུམ། སྟེང་ཤོད་གཉིས་ལ་ཁྲུས་ཁང་དྲུག་དང་གསང་སྤྱོད་དྲུག །གཉེར་ཁང་དང་རུང་ཁང་ཤག་མིག་གཉིས། གཞན་ཡང་སྒོ་རྭའི་ནང་དང་། རྩིག་པའི་མཐའ་སྐོར་བཅས་ལ་རྡོ་གཅལ་གང་ལེགས་དང་། ཁང་པའི་གཡས་གཡོན་དུ་ཆུ་ཡུར་དང་། ཆབ་ཁང་སོགས་ལ་ཆུ་འདྲེན་བྱེད་ཀྱི་འབྲིང་བ་སྤུས་ལེགས་གཅིག་བཅས་དང་། ཕ་རན་སིར་གནས་ཞུགས་དགེ་བཤེས་བློ་བཟང་ཐུབ་བསྟན་ལགས་ནས་རོགས་རམ་མཐུན་འབྱོར་གནང་ནས་ཁང་པའི་མདུན་ངོས་ཀྱི་ལམ། དགེ་འདུན་རྣམས་ཀྱི་ན་བཟའ་སོགས་འཁྲུལ་བྱེད་དང་། ཚལ་ཞིང་ནང་ལ་ཆུ་འདྲེན་བྱེད་བཅས་ལ་དམིགས་ཏེ་མི་ཤུགས་ལག་བསྒུལ་གྱི་ཆུ་འདྲེན་འཕྲུལ་འཁོར་གཅིག་བཅས་གསར་བསྐྲུན་ཐུབ་པ་བྱུང་ཡོད། མཐུན་རྐྱེན་དེ་དག་ལོངས་སུ་སྤྱད་དེ་ལོ་མང་རིང་བཞུགས།
གནས་སྐབས་དེར་མཐུན་རྐྱེན་གང་ལེགས་ཡོད་ཀྱང་རིམ་པ་བཞིན་བོད་ནས་གསར་དུ་འབྱོར་བ་དང་རྒྱ་གར་བྱང་རྒྱུད་ནས་གྲྭ་རྒྱུན་གསར་ཞུགས་པ་མང་དག་ཅིག་བྱུང་བས་སྡོད་ཤག་གི་དཀའ་ངལ་ཅི་ཆེར་འཕྲད་སྐབས་རང་ཅག་རྣམས་ལ་བཀའ་དྲིན་གྱི་བདག་ཉིད་དགེ་བའི་བཤེས་གཉེན་ཆེན་པོ་རྒན་ཚུལ་ཁྲིམས་རྒྱལ་མཚན་མཆོག་མོན་གྷོ་དགའ་ལྡན་དུ་ཆིབས་བསྒྱུར་བསྐྱངས་སྐབས། རང་གྲྭ་གནས་བརྟན་བགྲེས་སོང་རྣམས་ཀྱིས་གཙོས་ཁང་ཚན་གྱི་ལས་བྱེད་རྣམས་ཀྱིས་དགེ་བཤེས་མཆོག་ལ་དངོས་ཡོད་ཀྱི་གནས་ཚུལ་རྣམས་སྙན་སེང་ཞུས་པ་ན་དགེ་བཤེས་མཆོག་ནས་ཀྱང་ཐུགས་དགོངས་ཆེ་བཞེས་ཀྱིས་ལོ་གཅིག་དང་ཕྱེད་ཀ་ལྷག་ཙམ་རིང་ཕྱི་རྒྱལ་ཡུལ་གྲུ་ཁག་ཏུ་ཆོས་ཕྱོགས་ཀྱི་ཐོག་ནས་འཁྲབ་སྟོན་མཛད་རིམ་ཞིག་གོ་སྒྲིགས་གནང་རྒྱུའི་ཞལ་བཞེས་བཟང་པོ་ཐོབ་པར་བརྟེན་ཁང་ཚན་གྱི་དགེ་འདུན་པ་ཁག་ཅིག་ཕྱི་རྒྱལ་ཡུལ་གྲུ་ཁག་ཏུ་དཀའ་བ་ཁྱད་བསད་ཀྱིས་ཕེབས་ཏེ་ཡོང་འབབ་གང་འཚམས་བྱུང་ཡོད། དེའི་ཁོངས་ནས་ཐོག་མར་གྲྭ་ཚང་རིན་པོ་ཆེ་ལ་བསྙེན་བཀུར་གྱ་ནོམ་པ་དང་སྤྱི་འབུལ་བཅས་འབུལ་ལམ་ཞུས། དེ་ནས་སྔོན་གྱི་དམིགས་ཡུལ་བཞིན་ཕྱི་ལོ་༢༠༠༤ཟླ་༡༡་ནང་སྔར་གྲྭ་ཚང་གིས་གནང་བའི་ས་ཆ་ཕྱེད་ཀ་ས་སྟོང་དུ་ལྷག་ཡོད་པ་དེའི་སྟེང་གྲྭ་ཤག་གསར་པ་ཐོག་བརྩེགས་བཞི་ཅན། གྲྭ་པ་དཀྱུས་མ་བཞུགས་ས་ཁང་པ་མདོ་སྦུག་གཉིས་ལྡན་མཐོ་ཡངས་གསལ་གསུམ་དང་རྒྱབ་མདུན་གཉིས་ཀར་འཁོར་ཁེབས་ལྡན་པ་གྲངས་སོ་དྲུག་དང་། གནས་བརྟན་བགྲེས་སོང་རྣམས་བཞུགས་ཡུལ་ཁྲུས་ཁང་དང་གསསང་སྤྱོད་རུང་ཁག་བཅས་རང་འགྲིག་ཡོད་པ་བཞི། ཁང་ཚན་གྱི་ཁོངས་གཏོགས་ཕྱི་རྒྱལ་ལ་བཞུགས་པ་རྣམས་ཕེབས་སྐབས་བཞུགས་ས་དང་། འབྲེལ་ཡོད་བླ་མ་རྣམས་དང་རྒྱུན་དུ་འབྲེལ་ཡོད་ཀྱི་འགྲུལ་པ་རྣམས་བཞུགས་ས་ཁྲུས་ཁང་དང་གསང་སྤྱོད་རུང་ཁང་བཅས་མཐུན་རྐྱེན་ཚང་བའི་འགྲོན་ཁང་གསུམ། གཞན་ཡང་བླ་བྲང་གི་ཚོད་དུ་ཁང་པ་མདོ་སྦུག་གཉིས་དང་རུང་ཁང་། དེ་བཞིན་ཁྲུས་ཁང་དང་གསང་སྤྱོད་བཅས་ཚང་བ་གཉིས། དགེ་བའི་བཤེས་གཉེན་ཆེན་པོ་རྒན་ཚུལ་ཁྲིམས་རྒྱལ་མཚན་མཆོག་གི་གཟིམ་ཤག་མདོ་སྦུག་གཉིས་དང་། ཁྲུས་ཁང་གསང་སྤྱོད་རུང་བཅས་ཚང་བ་གཅིག ཁང་ཚན་ཤེས་ཚོགས་ཀྱི་ལས་འགུལ་ཁང་མིག་གཉིས། བཀའ་བསྟན་སོགས་དཔེ་ཆ་བལྟ་ཀློག་གནང་ས་དཔེ་མཛོད་ཁང་ཆེ་བ་གཅིག ཟུར་དུ་ཁྲུས་ཁང་བཅུ་དྲུག་དང་གསང་སྤྱོད་བཅུ་དྲུག འོག་ཟུར་དུ་ན་བཟའ་འཁུ་ས་ཁྲུས་གཞོངས་དང་ཁྲུས་སྟེགས། གཞན་ཡང་ཐོག་བརྩེགས་བཞི་སོ་སོར་ཞལ་ཁྲུས་གནང་ས་ཁྲུས་ཀྱི་གཞོངས་པ་བཞི། སྟེང་ཐོག་ཏུ་ཤག་ཆུང་གཅིག་བཅས་གང་ལེགས་ཡོད། གཞན་ཡང་གཞུང་གློག་དང་ཉི་གློག་གཉིས་ཀའི་ཆུ་འཐེན་འཕྲུལ་འཁོར། གྲྭ་ཤག་ཐམས་ཅད་ཀྱི་ནང་དུ་ཉི་གློག །ཤུགས་ཚད་ཆེ་བའི་སྐམ་གློག་བཅས་ཕྱི་ནང་གང་ས་ནས་གྲ་འགྲིགས་སྤུས་དག་པ་ལེགས་སྒྲུབ་ཐུབ་པ་བྱུང་ཡོད།།